சிங்கப்பூர் உணவுத் திருவிழா 2025: பாரம்பரியம், புதுமை, சமூகத்தின் விருந்து

சிங்கப்பூர் உணவுத் திருவிழா 2025: சமையல் பாரம்பரியமும் புதுமையும் சந்திக்கும் இடம்

ஒவ்வொரு செப்டம்பரிலும் உணவுப் பிரியர்களின் உற்சாகமான கொண்டாட்டத் தளமாக சிங்கப்பூர் மாறுகிறது. ஆனால், சிங்கப்பூர் உணவுத் திருவிழா 2025 (SFF 2025) இதுவரையிலானவற்றில் மிகுந்த லட்சியமும் உணர்வுபூர்வமும் கொண்ட விழாவாக அமையும் என எதிர்பார்க்கப்படுகிறது. செப்டம்பர் 4 முதல் 24 வரை, உணவு, கலாசாரம், படைப்பாற்றல் ஆகியவற்றைக் கொண்டாடும் 32ஆவது ஆண்டு விழாவை இந்த நகர-நாடு நடத்துகிறது. நாட்டின் வளமான சமையல் அடையாளத்தைப் பிரதிபலிக்கும் சுவைகள், கதைகள், அனுபவங்கள் நிறைந்த வண்ணமயமான உலகில் உள்ளூர்வாசிகளையும் வருகையாளர்களையும் இந்த விழா ஒன்றிணைக்கிறது. இந்த ஆண்டின் கருப்பொருளான “சாப்பிட்டீர்களா?” என்பது சாதாரணமாக நலம் விசாரிக்கும் கேள்வியைவிட மேலானது. ஆசியச் சமூகங்களில் உணவு உருவாக்கும் அக்கறை, பிணைப்பு, சொல்லப்படாத உறவுகள் ஆகியவற்றை வெளிப்படுத்தும் பண்பாட்டுச் சின்னம் அது.

15-க்கும் மேற்பட்ட முக்கிய நிகழ்வுகள், 50-க்கும் அதிகமான தேர்ந்தெடுக்கப்பட்ட கூட்டாளர் அனுபவங்கள், பாரம்பரியமும் நவீனமும் கலந்த கவர்ச்சிகரமான நிகழ்ச்சிகள் ஆகியவற்றுடன், உலகளாவிய உணவு மையமாக சிங்கப்பூரின் நிலையை SFF 2025 வெளிப்படுத்தவுள்ளது. தெருவோர உணவுக்கடைகள் முதல் உயர்தர உணவகங்கள் வரை, உணவு வாகனங்கள் முதல் ஆழ்ந்து அனுபவிக்க வைக்கும் கலை நிறுவல்கள் வரை, அனைவரும் சுவைக்கவும், உருவாக்கவும், ஒன்றாகக் கொண்டாடவும் இந்த விழா அழைக்கிறது.

SFF 2025-ஐ தனித்துவமாக்குவது எது?

மக்களைத் தலைமுறைகள், கலாசாரங்கள், சமூகங்கள் கடந்தும் உணவு எவ்வாறு இணைக்கிறது என்பதைக் கொண்டாடுவதே SFF 2025-இன் அடிப்படை நோக்கம். விழா நிகழ்ச்சிகள் மூன்று முக்கியத் தூண்களை மையமாகக் கொண்டுள்ளன: பாரம்பரியம், சமகாலம், புதுமை. பங்கேற்பையும் புதிய கண்டுபிடிப்புகளையும் ஊக்குவிக்கும் சிறப்பு நிகழ்வுகள், தற்காலிக உணவகங்கள், தனித்துவமான அனுபவங்கள் வழியாக ஒவ்வொரு தூணும் உயிர்பெறுகிறது.

சிங்கப்பூர் சுற்றுலா வாரியத்தின் ஓய்வுநேர நிகழ்வுகள் இயக்குநர் குவோ தேயி, செய்தி அறிக்கை ஒன்றில் விழாவின் உணர்வை இவ்வாறு எடுத்துரைத்தார்:

சிங்கப்பூர் உணவுத் திருவிழா 2025-ஐ சிறப்பாக்குவது, இடங்களைப் புதியவற்றைக் கண்டறியும் தளங்களாக மாற்றுவதுதான். அங்கு வருகையாளர்கள் உணவைச் சுவைப்பதோடு மட்டுமல்லாமல், நமது உணவுப் பாரம்பரியத்தை உருவாக்குவதிலும் நேரடியாகப் பங்கேற்கிறார்கள்.

இந்த ஆண்டு, விழாவின் முக்கிய மையமான Mise en Place @ Dempsey Hill, உணவு, கலாசாரம், வாழ்க்கைமுறை ஆகியவற்றுக்கான துடிப்பான மையமாகச் செயல்படும். தற்காலிகச் சுவை அறிமுகங்கள் முதல் நேரடி செயல்விளக்கங்கள் வரை பல்வேறு அனுபவங்களை இங்கு வருகையாளர்கள் ஆராயலாம். சிங்கப்பூரின் மாறிவரும் உணவுக் காட்சியில் அவர்களை ஆழ்ந்து ஈடுபடுத்தும் வகையில் இவை அனைத்தும் வடிவமைக்கப்பட்டுள்ளன.

சிறப்பு நிகழ்வுகள்: விழாவின் இதயம்

SFF 2025-இன் சிறப்பு நிகழ்வுகள் வெறும் உணவு விருந்துகளாக மட்டும் அமையாமல், கதைசொல்லல், படைப்பாற்றல், சமூக உணர்வு ஆகியவற்றை இணைக்கும் ஆழ்ந்த அனுபவங்களாக வடிவமைக்கப்பட்டுள்ளன. முக்கியமான மூன்று நிகழ்வுகள்:

உணவே கலை (செப்டம்பர் 5–6)

பல புலன்களையும் ஈடுபடுத்தும் இந்த நிகழ்வு, சமையல் கலையைப் படைப்பாற்றல் வெளிப்பாட்டுக்கான ஓவியப் பலகையாக மாற்றுகிறது. Marina Bay Sands-இல் நடைபெறும் Food Is Art நிகழ்வில், விருது பெற்ற சமையல் கலைஞர்கள், பானத் தயாரிப்பாளர்கள், கலைஞர்கள், இசைக் கலைஞர்கள் ஒன்றிணைந்து உண்ணக்கூடிய கலைப் படைப்புகளை உருவாக்குகிறார்கள். ஆஸ்திரேலியப் புகழ்பெற்ற இனிப்புப் பண்ட நிபுணர் அட்ரியானோ ஸும்போ தலைமையிலான Zumbo Desserts ஆசியாவில் முதன்முறையாக அறிமுகமாவது இந்த நிகழ்வின் சிறப்பம்சம். கற்பனைத்திறன் மிக்க புதுமையான படைப்புகளுக்குப் பெயர்பெற்றவர் அவர். நேரடி இசை, தேர்ந்தெடுக்கப்பட்ட உணவு ருசிப்புகள், சிங்கப்பூரின் உணவங்காடிப் பண்பாட்டால் ஊக்கம் பெற்ற The Chef வரைகதை நாவலின் வெளியீடு ஆகியவற்றையும் பங்கேற்பாளர்கள் அனுபவிக்கலாம்.

ஆடை அலங்காரத் தொகுப்பாளர் டேனியல் போயும் படைப்பாற்றலுக்கு மேலும் ஒரு பரிமாணம் சேர்க்கிறார். சமையல் கலைக்கும் காட்சிக் கலைக்கும் இடையிலான எல்லைகளை மங்கச் செய்யும் வகையில், ஆடையையும் உணவையும் அவர் ஒருங்கிணைத்து வழங்குகிறார். பாரம்பரியத்தையும் துணிச்சலான புதிய சிந்தனைகளையும் இணைக்கும் சிங்கப்பூரின் திறனுக்கு இந்த நிகழ்வு சான்றாகும்.

நீண்ட மேசை விருந்து (செப்டம்பர் 12–13)

The Long Table நிகழ்வில், அனைவரும் இணைந்து உணவருந்துவது மைய இடம் பெறுகிறது. Intercontinental Singapore-இல் நடைபெறும் இந்த ஐந்து வகை உணவு விருந்தை, நாடு முழுவதும் உள்ள முன்னணி விடுதிகளின் சமையல் கலைஞர்கள் தயாரிக்கிறார்கள். ஒவ்வொரு உணவும் சிங்கப்பூரின் சமையல் பாரம்பரியத்துக்கு ஓர் அர்ப்பணிப்பு. மக்களை ஒன்றிணைக்கும் உணவின் ஆற்றலைக் கொண்டாடும் நாடகபாணி கதைசொல்லலும், ஆழ்ந்து அனுபவிக்க வைக்கும் நிகழ்ச்சிகளும் உணவுடன் இடம்பெறும்.

இந்த நிகழ்வு சாப்பிடுவதைப் பற்றியது மட்டுமல்ல; கதைகளைப் பகிர்வது, மரபுகளைப் போற்றுவது, உண்மையிலேயே நீண்ட மேசையில் சமூகத்தின் அன்பான அரவணைப்பை அனுபவிப்பது பற்றியது.

எதிர்கால உணவு (செப்டம்பர் 19–20)

எதிர்காலத்தை நோக்கிப் பார்ப்பதாக அமையும் Future Food, சமையல் புதுமையின் முன்னணிப் போக்குகளை ஆராய்கிறது. Marquee Singapore-இல் நடைபெறும் இந்த நிகழ்வு, நிலைத்தன்மை சார்ந்த உணவு விருந்து, உணவுத் தொழில்நுட்பம், அடுத்த தலைமுறைப் பொருட்கள் ஆகியவற்றை முன்னிலைப்படுத்துகிறது. புதிய வகை உணவுகளைப் பங்கேற்பாளர்கள் ருசிக்கலாம்; மூலக்கூறு அளவிலான சமையல் செயல்விளக்கங்களைக் காணலாம்; உணவை விளைவிக்கும், சமைக்கும், ரசிக்கும் முறைகளை மறுவரையறை செய்யும் முன்னோடிகளிடமிருந்து கற்றுக்கொள்ளலாம்.

சுவையையும் நிலைத்தன்மையையும் படைப்பாற்றலையும் இணைத்து, உணவு சுவையானதாகவும் பொறுப்புணர்வுடன் உருவாக்கப்பட்டதாகவும் இருக்க முடியுமா எனச் சிந்திக்குமாறு Future Food பங்கேற்பாளர்களைத் தூண்டுகிறது.

தற்காலிக நிகழ்வுகள்: நகரமெங்கும் பரவும் விழா

முக்கிய நிகழ்விடங்களைத் தாண்டி, சிங்கப்பூர் முழுவதும் உள்ள குடியிருப்புப் பகுதிகளுக்கு உணவு அனுபவங்களை நேரடியாகக் கொண்டுசெல்லும் தொடர் நிகழ்வுகள் மூலம் SFF 2025 உயிர்ப்படைகிறது. ஆகஸ்ட் 18 முதல் செப்டம்பர் 14 வரை நடைபெறும் Food Truck City Tours நிகழ்வுதான் அதிகம் எதிர்பார்க்கப்படுவது. நான்கு உணவு வாகனங்கள் Ocean Financial Centre, Keppel South Central, Pasir Ris-இல் உள்ள Downtown East, Singapore Science Park-இல் உள்ள Geneo உள்ளிட்ட முக்கிய இடங்களுக்குச் செல்லும்.

ஒவ்வொரு வாகனத்திலும் முன்னணி சமையல் கலைஞர்களும் நிறுவனங்களும் தயாரிக்கும் தனிச்சிறப்பான உணவுகள் கிடைக்கும். அவற்றில் சில:

• IHG Hotels: லசூனி சிக்கன் டிக்கா, குட்டி அபாலோனுடன் சிங்கப்பூர் லக்சா, டைகர் இறால் மசமன் கறி, வாக்யூ மாட்டிறைச்சி ரெண்டாங்
• The Maha Co by Yung Raja: தோசை டாக்கோஸ் (ஆட்டிறைச்சி ரெண்டாங், மசாலா இறால்)
• Hello Arigato: சிங்கப்பூர் சாத்தே சாண்டோ, நியோன்யா பாண்டன் கிளவுட், மட்சா பாண்டன் கிளவுட்
• 11:11 Sweet: ராஸ்பெர்ரி சாஃப்ட் சர்வ்
• Bar On Wheels: உயர்தர காக்டெய்ல் பைகள்

எளிதில் அணுகக்கூடியதாகவும் திடீரெனச் சென்று அனுபவிக்கக்கூடியதாகவும் இந்தத் தற்காலிக நிகழ்வுகள் வடிவமைக்கப்பட்டுள்ளன. இதனால் வேலைப்பளு மிக்க சிங்கப்பூர்வாசிகளும் ஆர்வமுள்ள வருகையாளர்களும் எங்கிருந்தாலும் விழாவின் சுவைகளைச் சுலபமாக ருசிக்கலாம்.

தனித்துவ நிகழ்வுகளும் SG60 சிறப்புகளும்: பாரம்பரியத்தையும் படைப்பாற்றலையும் போற்றுதல்

உணவைத் தாண்டி, சமையல் கலையைக் கலாசாரம், வரலாறு, புதுமை ஆகியவற்றுடன் இணைக்கும் ஆழ்ந்த, பங்கேற்பு சார்ந்த அனுபவங்களை SFF 2025 வழங்குகிறது. தனித்துவமான நிகழ்வுகளில் சில:

• Yantra-வில் இந்தியப் பாரம்பரிய உணவு விருந்து
• Harummanis-இல் மலாய் உயர்தர உணவு விருந்து
• Jiak Kim House-இல் ஓபரா கருப்பொருள் கொண்ட இரவு விருந்து

தேர்ந்தெடுக்கப்பட்ட உணவுப் பட்டியல்கள், நேரடி நிகழ்ச்சிகள், கதைசொல்லல் ஆகியவற்றின் வழியாக சிங்கப்பூரின் பன்முகப் பண்பாட்டு வேர்களை ஆராய இந்த அனுபவங்கள் விருந்தினர்களுக்கு அழைப்பு விடுக்கின்றன.

SG60 எனப்படும் சிங்கப்பூரின் 60ஆவது சுதந்திர ஆண்டு நிறைவைக் கொண்டாடும் வகையில், பாரம்பரிய உணவங்காடிச் சுற்றுலாக்கள், பண்ணையிலிருந்து நேரடியாக மேசைக்கு வரும் உணவு விருந்துகள், கடல் உணவு விருந்துகள் உள்ளிட்ட சிறப்பு நிகழ்வுகளை இந்த விழா நடத்துகிறது. விழாவின் பாரம்பரிய உணவங்காடிக் கூட்டாளியாக Chinatown Complex Food Centre தேர்வு செய்யப்பட்டுள்ளது. சிங்கப்பூரின் உணவங்காடிப் பாரம்பரியத்தை வழிகாட்டியுடன் அறிமுகப்படுத்தும் A Taste of Time நிகழ்வை அது நடத்துகிறது. 226 கடைகளைக் கொண்ட இந்தப் புகழ்பெற்ற இடம், தலைமுறைகளாகக் கடத்தப்பட்ட சுவைகளுக்கும் கதைகளுக்கும் உயிருள்ள அருங்காட்சியகமாக மாறுகிறது.

விழா கிராமமும் குடும்பத்தினருக்கான பொழுதுபோக்கும்

Bayfront Event Space-இல் உள்ள Festival Village, குடும்பங்களும் உணவுப் பிரியர்களும் கட்டாயம் செல்ல வேண்டிய இடமாகும். ஏழு கருப்பொருள் மண்டலங்களில் 100-க்கும் மேற்பட்ட உணவு நிறுவனங்கள் இடம்பெறுகின்றன. SG Food Walk-இல் புகழ்பெற்ற தெருவோர உணவுகள் முதல் Sweets Alley-யில் இனிப்புகள், Durian BB Park-இல் வெப்பமண்டலச் சுவைகள் வரை அனைத்தையும் வருகையாளர்கள் ருசிக்கலாம். சமையல் கலை வகுப்புகள், பயிலரங்குகள், நேரடி சமையல் செயல்விளக்கங்கள் என எல்லா வயதினருக்கும் நேரடியாகக் கற்றுக்கொள்ளும் வாய்ப்புகள் உள்ளன.

ஹைனானீஸ் சிக்கன் ரைஸ், சில்லி கிராப், லக்சா, சாத்தே அல்லது துணிச்சலான கலப்பு உணவுகள் என எதன் மீது விருப்பம் இருந்தாலும், சமையல் சாகசங்களுக்கு Festival Village ஒரே இடத்தில் அனைத்தையும் வழங்குகிறது.

மின்னிலக்கப் பங்கேற்பும் உலகளாவிய வரம்பும்

முழுமையான மின்னிலக்கச் செயல்பாடுகள் மூலம் நேரடி நிகழ்வுகளைத் தாண்டியும் SFF 2025 தனது வரம்பை விரிவுபடுத்துகிறது. ஜூலையில் தொடங்கும் Singapore Food Stories மின்னிலக்கத் தொடர், அன்றாட சிங்கப்பூர்வாசிகளின் தனிப்பட்ட அனுபவங்களையும் சமையல் குறிப்புகளையும் பகிர்ந்து, உணவின் உணர்வுபூர்வ, பண்பாட்டுச் சிறப்பை எடுத்துக்காட்டுகிறது. இணையவழி மற்றும் சமூக ஊடகச் செயல்பாடுகள், திரைக்குப் பின்னால் உள்ள காட்சிகள், நேரடி நிகழ்வுத் தருணங்கள், உலகெங்கும் உள்ள பார்வையாளர்களுக்கான ஊடாடும் அனுபவங்கள் ஆகியவற்றை வழங்குகின்றன.

உணவகங்கள், மதுக்கூடங்கள், நிறுவனங்கள் உள்ளிட்ட 50-க்கும் மேற்பட்ட இணைநிறுவனங்கள் சிறப்பு உணவுப் பட்டியல்களையும் நிகழ்வுகளையும் வழங்குவதால், விழாவின் தாக்கம் நகரம் முழுவதும் மட்டுமல்லாமல் அதற்கு அப்பாலும் உணரப்படுகிறது.

“சாப்பிட்டீர்களா?” என்பது ஏன் முக்கியம்?

ஆசியப் பண்பாட்டில் ஆழமாக வேரூன்றியுள்ள இந்த விழாவின் கருப்பொருளில், ஒருவர் சாப்பிட்டாரா எனக் கேட்பது அன்பையும் அக்கறையையும் வெளிப்படுத்தும் வழியாகும். விழா இயக்குநர் பிளேக் ஹாரிஸ் கூறுவதாவது:

‘சாப்பிட்டீர்களா?’ என்ற கருப்பொருள், உணவு அன்பையும் நம்மை ஒன்றிணைக்கும் உறவுகளையும் வெளிப்படுத்தும் சிங்கப்பூரின் உணவுப் பண்பாட்டின் இதயத்தைப் பிரதிபலிக்கிறது. இந்த ஆண்டு, உணவின் எதிர்காலத்தை வடிவமைக்கும் புதுமைகளைத் தழுவியபடியே நமது வளமான சமையல் பாரம்பரியத்தைப் போற்றுகிறோம்.

சிங்கப்பூரில் உணவு என்பது பசியாற்றுவதைக் காட்டிலும் மேலானது. அது அக்கறையின் மொழி, தலைமுறைகளை இணைக்கும் பாலம், தேசியப் பெருமையின் அடையாளம். இந்த உணர்வைக் கொண்டாடும் SFF 2025, விருந்தில் கலந்துகொள்ளவும், தங்கள் கதைகளைப் பகிரவும், புதிய நினைவுகளை ஒன்றாக உருவாக்கவும் அனைவரையும் அழைக்கிறது.

விழாவுக்குச் செல்பவர்களுக்கான நடைமுறைக் குறிப்புகள்

SFF 2025-க்கான நுழைவுச் சீட்டுகளை singaporefoodfestival.com என்ற இணையதளத்தில் வாங்கலாம். வழக்கமான நுழைவுச் சீட்டுகளின் விலை 20 முதல் 50 SGD வரை; விஐபி அனுபவங்களுக்கு இதைவிட அதிகம். வாரநாட்களில் கூட்டம் குறைவாக இருக்கும்; வார இறுதிகளில் கலகலப்பான சூழல் நிலவும். சிறந்த அனுபவத்துக்காக முன்கூட்டியே திட்டமிட்டு, அறிவிப்புகள், நிகழ்ச்சி அட்டவணைகள், சிறப்பு நிகழ்வுகள் ஆகியவற்றுக்காக விழாவின் இணையதளத்தையும் சமூக ஊடகப் பக்கங்களையும் பார்க்கவும்.

விழாவுக்குப் பிறகும், நிதானமான சூழலில் உண்மையான இந்திய உயர்தர உணவுகளை வழங்கும் Akasa Singapore போன்ற புகழ்பெற்ற உணவகங்களுக்குச் சென்று, தங்கள் சமையல் பயணத்தை வருகையாளர்கள் தொடரலாம்.

சுருக்கமாக

• சிங்கப்பூர் உணவுத் திருவிழா 2025 செப்டம்பர் 4 முதல் 24 வரை நடைபெறுகிறது. “சாப்பிட்டீர்களா?” என்ற கருப்பொருளுடன் 32ஆவது ஆண்டைக் கொண்டாடுகிறது.
• 15-க்கும் மேற்பட்ட முக்கிய நிகழ்வுகள், 50-க்கும் அதிகமான கூட்டாளர் அனுபவங்கள், பாரம்பரியம், சமகாலம், புதுமை ஆகியவற்றை இணைக்கும் சமையல் நிகழ்ச்சிகள் இடம்பெறுகின்றன.
• புகழ்பெற்ற சமையல் கலைஞர் அட்ரியானோ ஸும்போ பங்கேற்கும் Food Is Art, அனைவரும் இணைந்து உணவருந்தும் The Long Table விருந்து, நிலைத்தன்மையை முன்னிறுத்தும் Future Food ஆகியவை சிறப்பு நிகழ்வுகள்.
• உணவு வாகன நகரச் சுற்றுலாக்கள் சிங்கப்பூரின் பல்வேறு பகுதிகளுக்கு தனிச்சிறப்பு உணவுகளைக் கொண்டுசெல்கின்றன.
• தனித்துவ நிகழ்வுகளும் SG60 சிறப்பு நிகழ்ச்சிகளும் சிங்கப்பூரின் பன்முகப் பண்பாட்டு பாரம்பரியத்தையும் 60 ஆண்டுகாலச் சுதந்திரத்தையும் போற்றுகின்றன.
• Festival Village குடும்பத்தினருக்கான பொழுதுபோக்கு, சமையல் கலை வகுப்புகள், உள்ளூர் மற்றும் சர்வதேச உணவுகளின் பரந்த தேர்வு ஆகியவற்றை வழங்குகிறது.
• மின்னிலக்க உள்ளடக்கங்களும் சமூக ஊடகச் செயல்பாடுகளும் விழாவின் வரம்பை உலகளவில் விரிவுபடுத்துகின்றன.
• நுழைவுச் சீட்டுகளையும் முழு விவரங்களையும் விழாவின் அதிகாரப்பூர்வ இணையதளத்தில் பெறலாம்.