நடுப்பணி வாழ்க்கையில் மறுதிறன் பெறுவதற்கான மாற்றப் பாதை சிங்கப்பூருக்குத் தேவைப்படுவது ஏன்

மாற்றத்தில் இருக்கும் நாடு; விடுபட்டுப்போன ஒரு பிரிவினர்

அடுத்தகட்ட மாற்றத்துக்கு ஏற்ப தொழிலாளர்கள் தயாராக இருக்கச் சிங்கப்பூர் பெருமளவில் முதலீடு செய்து வருகிறது. சமீபத்தில் பட்டம் பெற்றவர்களுக்கு வளர்ச்சித் துறைகளில் கட்டமைக்கப்பட்ட பணிப் பாதைகள் வழங்கப்படுகின்றன. தொழில்நுட்ப மாற்றத்தால் அல்லது மறுசீரமைப்பால் வேலை இழந்தவர்கள் மறுதிறன் பயிற்சித் திட்டங்களையும் தற்காலிக நிதி உதவியையும் பெறலாம். தொழிலாளர் தொகுப்பில் இடைப்பட்ட நிலையில் இருப்போர் எண்ணிக்கை அதிகரித்து வருகிறது. இவர்கள் பணிநீக்கம் செய்யப்பட்டதால் அல்ல, தாங்களாகவே முடிவெடுத்து வேலையிலிருந்து விலகுபவர்கள். குழந்தைகளையோ வயதான பெற்றோரையோ கவனிக்கவும், மனச்சோர்விலிருந்து மீளவும், மாறிவரும் மதிப்பீடுகளுக்கும் தொழில்துறைகளுக்கும் ஏற்ப தங்கள் வாழ்க்கைத்தொழிலை மறுசீரமைக்கவும் அவர்கள் வேலையை விட்டு விலகுகின்றனர். திட்டமிட்ட நோக்கத்துடன் அவர்கள் வெளியேறினாலும், தற்போதைய கொள்கைக் கட்டமைப்புகள் அவர்களை ஆடம்பரமாக நடந்துகொள்பவர்களாகவோ கண்ணுக்குத் தெரியாதவர்களாகவோ கருதுகின்றன.

பல குடும்பங்களுக்கு, தாங்களே தீர்மானித்து மேற்கொள்ளும் பணி மாற்றங்கள் ஆடம்பரமல்ல. நீண்டகால உடல்நலக் குறைவைத் தடுக்கவும், சமூகம் சார்ந்திருக்கும் பராமரிப்புப் பணியைத் தொடரவும், இன்னும் உருவாகாத வேலைகளுக்கான திறன்களை வளர்த்துக்கொள்ளவும் அவை உதவும். விருப்பமின்றி வேலை இழப்பதற்கும் விருப்பத்துடன் வேலையை விட்டு விலகுவதற்கும் இடையே கொள்கை இன்னும் கடுமையான வேறுபாட்டைக் காட்டுகிறது. ஆட்குறைப்புக்கு ஆளானால் பயிற்சி உதவித்தொகை, பணியிடப் பயிற்சி போன்ற பாதைகள் உள்ளன. படிப்பதற்கோ பராமரிப்புப் பணிக்கோ வாழ்க்கையை மறுதொடக்கம் செய்வதற்கோ ராஜினாமா செய்தால், ஆதரவு குறைவாகவும் சிதறியதாகவும் உள்ளது. மறுதிறன் பயிற்சிக்கான வலுவான அடித்தளங்களை சிங்கப்பூர் அமைத்துள்ளது. அடுத்த கட்டமாக, நோக்கத்துடன் வேலையை விட்டு விலகுவோர் இடைவெளிகளில் சிக்காமல் தொழில்வாழ்க்கையை மாற்ற உதவும் தெளிவான மாற்றப் பாதை தேவை.

சிங்கப்பூர் தற்போது வழங்குவது என்ன

வயது வந்தோருக்கான தற்போதைய கற்றல் அமைப்பு விரிவானதும் நுட்பமானதுமாகும். சுமார் 30 துறைகளில் வளர்ந்து வரும் பணிகளில் புதிதாகப் பணியில் சேருவோர் அல்லது ஏற்கெனவே பணிபுரிவோர் மறுதிறன் பெற, Workforce Singapore நடத்தும் Career Conversion Programmes உதவுகின்றன. இதில் மூன்று வகைகள் உள்ளன. Place and Train திட்டம் வேலை தேடுவோரைப் பணியில் அமர்த்தி, பணியிடத்திலோ தொழில்துறையிலோ பயிற்சி அளிக்கிறது. Attach and Train திட்டம் வேலை தேடுவோருக்குப் பணியிடப் பயிற்சி அளிக்கும்போதே அவர்களைப் பயிற்றுவிக்கிறது. Job Redesign Reskilling திட்டம் தொழில்துறை மாற்றத்துக்கு ஏற்ற புதிய பணிகளில் ஏற்கெனவே உள்ள ஊழியர்களை மீண்டும் பயிற்றுவிக்க நிறுவனங்களுக்கு உதவுகிறது. மறுதிறன் பயிற்சிக்காக முதலாளிகளுக்கு ஊதிய ஆதரவு வழங்கப்படுகிறது; நீண்டகாலமாக வேலையில்லாதவர்களுக்கும் 40 வயது மற்றும் அதற்கு மேற்பட்ட முதிர்ந்த வேலை தேடுவோருக்கும் கூடுதல் ஆதரவு கிடைக்கும். 21 வயது மற்றும் அதற்கு மேற்பட்ட சிங்கப்பூர் குடிமக்களும் நிரந்தரவாசிகளும் பொதுவாகப் பட்டப்படிப்பு அல்லது தேசிய சேவை முடிந்து குறைந்தது இரண்டு ஆண்டுகளுக்குப் பிறகு இதற்குத் தகுதி பெறுவர். புதிய பணி குறிப்பிடத்தக்க அளவில் மாறுபட்டதாக இருக்க வேண்டும்.

தனிநபர்களுக்கான SkillsFuture Career Transition Programme பெரிதும் விரிவடைந்துள்ளது. 2022ஆம் ஆண்டின் நடுப்பகுதி முதல் 2024ஆம் ஆண்டின் இறுதிவரை பயிற்சி பெற்றவர்களில், இதற்கு முன்பு வேலையில்லாதவர்களாக இருந்தவர்களில் சுமார் 55 சதவீதத்தினர் படிப்பை முடித்த ஆறு மாதங்களுக்குள் வேலை பெற்றனர். SkillsFuture Level Up Programme தொடங்கிய பிறகு பங்கேற்பு பெருமளவில் அதிகரித்தது. இந்தத் தொகுப்பின் கீழ் 40 வயது மற்றும் அதற்கு மேற்பட்ட குடிமக்களுக்கு S$4,000 கூடுதல் பயிற்சிக் கடன், தேர்ந்தெடுக்கப்பட்ட திட்டங்களுக்கு அதிகப் பாடநெறி மானியம், மேலும் வாழ்நாள் உச்சவரம்புடன் மாதம் S$3,000 வரை முழுநேரப் பயிற்சி உதவித்தொகை வழங்கப்பட்டது. முதல் ஆண்டிலேயே 36,000க்கும் மேற்பட்ட சிங்கப்பூரர்கள் புதிய கடனைப் பயன்படுத்தினர்; 8,500 பேர் தொழில் மாற்றப் படிப்புகளில் சேர்ந்தனர். இது முந்தைய ஆண்டைவிட சுமார் ஆறு மடங்கு அதிகம்.

பயிற்சி உதவித்தொகையில் பகுதிநேரப் பயிற்சிக்கான வாய்ப்பும் இடம்பெறும். அடுத்த ஆண்டு முதல், தகுதியான திட்டங்களில் பகுதிநேரம் படிக்கும் 40 வயது மற்றும் அதற்கு மேற்பட்ட தொழிலாளர்கள் புத்தகங்கள், போக்குவரத்து போன்ற செலவுகளை ஈடுகட்ட மாதம் S$300 பெறலாம். முழுநேர, பகுதிநேர உதவித்தொகைகள் இரண்டுக்கும் சேர்த்து வாழ்நாளில் 24 மாதங்கள் என்ற பொதுவான உச்சவரம்பு இருக்கும். இளங்கலைப் பட்டம் வரையிலான முழுத் தகுதிகளாகச் சேர்த்துக்கொள்ளக்கூடிய குறுந்தகுதிப் படிப்புகளுக்கும் இந்த உதவித்தொகை பொருந்தும். தன்னாட்சிப் பல்கலைக்கழகங்களில் முதுநிலைப் படிப்புகளுக்கான கட்டணத்தை ஈடுகட்டக் கடன்களைத் தொடர்ந்து பயன்படுத்தலாம்; ஆனால் முதுநிலைப் பட்டப்படிப்புகளுக்கு பயிற்சி உதவித்தொகை வழங்கப்படாது.

கொள்கையில் கவனிக்கப்படாத இடைவெளி

நிறுவனத்தின் ஆதரவுடன் மறுதிறன் பெறும் ஊழியராகவோ, பணியிடப் பயிற்சியில் ஈடுபடும் வேலை தேடுபவராகவோ, அண்மையில் வேலையிழந்த பயிற்சியாளராகவோ இருந்தால் தற்போதைய ஆதரவு சிறப்பாகச் செயல்படுகிறது. படிக்கவோ, பராமரிப்புப் பணியில் ஈடுபடவோ, புதிதாகத் தொடங்கவோ தெளிவான திட்டத்துடன் தாங்களாகவே வேலையை விட்டு விலகுவோருக்கு ஆதரவு குறித்த தெளிவு மிகக் குறைவு. வேலை தேடுவோருக்கான தற்காலிக நிதி உதவி, விருப்பமின்றி வேலையிழந்தவர்களுக்காக வடிவமைக்கப்பட்டுள்ளது. அங்கீகரிக்கப்பட்ட திட்டங்களில் சேரும் 40 வயது மற்றும் அதற்கு மேற்பட்டவர்களுக்கே பயிற்சி உதவித்தொகை முக்கியமாக வழங்கப்படுகிறது. 40 வயதுக்குட்பட்டோர் முழுநேர மறுபயிற்சிக்காக வேலையை விட்டு விலகினால், பாடநெறி மானியங்களும் கடன்களும் கிடைக்கும்; ஆனால் வருமான ஆதரவு இல்லை. பராமரிப்புப் பணிக்காகவோ மனச்சோர்விலிருந்து மீள்வதற்காகவோ திட்டமிட்ட இடைவேளை எடுப்போர், தங்கள் திறன்களைத் தக்கவைத்து வேலைவாய்ப்புத் தகுதியை உயர்வாக வைத்திருக்கும் வழியைக் கண்டறிவதில் சிரமப்படலாம்.

இந்த இடைவெளி முக்கியமானது. பராமரிப்புப் பணி குடும்பங்களைத் தாங்கி, பொதுச் செலவுகளைக் குறைக்கிறது. மனச்சோர்வைத் தடுப்பது அனுபவமிக்க தொழிலாளர்கள் நீண்டகாலம் உற்பத்தித் திறனுடன் பணியாற்ற உதவுகிறது. திட்டமிட்ட தொழில் மாற்றம், இடையூறு நெருக்கடியாக மாறுவதற்கு முன்பே வளர்ந்து வரும் துறைகளுக்கான திறன்களை உருவாக்குகிறது. இத்தகைய தேர்வுகளைத் தனிப்பட்ட ஆடம்பரமாகக் கருதுவது அவற்றின் பொதுப் பயனைக் குறைத்து மதிப்பிடுவதாகும். காலவரம்பும் கட்டமைப்பும் கொண்ட மாற்றப் பாதை இந்தப் பிரிவினரை அங்கீகரித்து, மேலும் வலுவான திறன்களுடன் மீண்டும் வேலைக்குத் திரும்ப உதவும்.

புள்ளிவிவரங்களுக்குப் பின்னால் உள்ள வாழ்க்கைகள்

நோக்கத்துடன் மேற்கொள்ளும் பணி மாற்றங்களுக்கு பெரும்பாலும் துணிவும் கவனமான திட்டமிடலும் தேவை. 35 வயதான டேரன் யோங், தனது மகனுக்கு இரண்டு வயதானபோது சுகாதாரத் தொழில்நுட்பத் துறையில் இருந்த மூத்த பொறுப்பிலிருந்து விலகினார். காலநிலை அறிவியல் மற்றும் கொள்கையில் முதுநிலைப் பட்டம் பெற குடும்பத்துடன் வெலிங்டனுக்குச் சென்ற அவர், கல்விக் கட்டணமாக சுமார் S$50,000 செலுத்தி, படிப்பின்போது சேமிப்பில் வாழ்ந்தார். வீடு தேடுவதில் ஏற்பட்ட சிக்கல்கள் முதல் அர்த்தமுள்ள வேலைக்குத் திரும்ப வேண்டிய அழுத்தம் வரை நிதி நெருக்கடி உண்மையானதாக இருந்தது. நெருக்கடியால் அல்ல, உறுதியான நம்பிக்கையால்தான் இந்த முடிவை எடுத்ததாக அவர் கூறினார்.

எனக்குப் பிடித்ததைச் செய்வதற்காக எல்லாவற்றையும் விட்டுவிட முடிவு செய்தேன்," என்றார் திரு யோங். "வெளிநாட்டில் 18 மாதங்கள் வரை தங்குவதற்குத் தேவையான சேமிப்பை நாங்கள் திட்டமிட்டு ஒதுக்கினோம்; அந்த முழுக் காலத்திலும் எங்களில் யாருக்கும் ஊதியத்துடன் கூடிய வேலை இருக்காது என்பதை அறிந்தே செய்தோம்.

நிறுவனங்களுக்குள் உள்ள கட்டமைக்கப்பட்ட பாதைகள், புதிய பாதையைத் தேர்ந்தெடுப்பதைப் பாதுகாப்பானதாக்கலாம். UOB தனது Better U திட்டத்தின் கீழ் குறுகிய, நெகிழ்வான பயிற்சித் தொகுதிகளை வடிவமைத்தது. பின்னர் தேர்ந்தெடுக்கப்பட்ட ஊழியர்கள் புதிய அல்லது மாறிவரும் பணிகளுக்கான மறுதிறன் பயிற்சி பெறும்போது முழு ஊதியம் வழங்கும் ஓராண்டு Pivot பாதையை உருவாக்கியது. பங்கேற்பாளர்களுக்கான உண்மையான வேலை வாய்ப்புகளை உருவாக்க, பயிற்றுவிப்பிலும் நிறுவனத்துக்குள் பணி பொருத்தத்திலும் வங்கி முதலீடு செய்தது. தனிநபருக்கு ஏற்றவாறு அமைந்து, அதிகத் தேவை உள்ள பணிகளில் கவனம் செலுத்தும் இந்த அணுகுமுறையைப் பிற முதலாளிகளும் பின்பற்றலாம்.

திட்டத்தை அறிமுகப்படுத்தியபோது, நிறுவனங்கள் எதிர்கொண்ட நிச்சயமற்ற நிலையை UOB குழும மனிதவளத் தலைவர் டீன் டோங் எடுத்துரைத்தார்: "எதிர்காலத்தில் எந்தத் திறன்களுக்கு அதிகத் தேவை இருக்கும் என்பது தெளிவாக இருக்கவில்லை." அவர் மேலும் கூறினார்: "தலைமுறைசார் செயற்கை நுண்ணறிவைப் பயன்படுத்திப் பார்க்கவும், அதன் சாத்தியங்களைப் புரிந்துகொள்ளவும், தங்கள் பணியில் அர்த்தமுள்ள வகையில் பயன்படுத்தவும் எங்கள் ஊழியர்களுக்கு அதிகாரமளிக்கும் பயிற்சித் திட்டங்களை நாங்கள் ஏற்கெனவே அறிமுகப்படுத்தத் தொடங்கியுள்ளோம்."

ஒவ்வொரு தொழில் மாற்றமும் வலுவான நிலையில் இருந்து தொடங்குவதில்லை. ஆல்ஃபிரட் லியூ இரண்டு முறை ஆட்குறைப்பால் வேலையை இழந்தார். அவர் கட்டமைக்கப்பட்ட சுற்றுச்சூழல் துறைக்கு மாறி, சிங்கப்பூர் பலதொழில்நுட்பக் கல்லூரியின் வயது வந்தோர் கற்றல் மையத்தில் நடைமுறைப் பாடநெறிகளைத் தொடர்ந்து பயின்று, பசுமைக் கட்டிடத் திட்டத்தில் திட்ட மேலாண்மைப் பொறுப்புக்குச் சென்றார். இப்போது பசுமைக் கட்டிடத் துறையில் தொழில்முறை அங்கீகாரம் பெற்ற, கரியமிலக் குறைப்புப் பணிகளுக்குத் தலைமை தாங்குகிறார். எளிதில் அணுகக்கூடிய, தொழில்துறைக்கு ஏற்ற பயிற்சியும் தெளிவான வேலைப் பாதைகளும் பின்னடைவைப் புதிய தொடக்கமாக மாற்ற முடியும் என்பதை அவரது கதை காட்டுகிறது.

வயதான தொழிலாளர்களுக்கு ஊதியத்தைவிட நோக்கமுள்ள பணி முக்கியமாக இருக்கலாம். நீண்டகால நிறுவனப் பணிக்குப் பிறகு, 57 வயதான ஆலன் சென் தனிப்பட்ட உடற்பயிற்சிப் பயிற்சியாளராக மறுபயிற்சி பெற்று, இப்போது Active Ageing Centre ஒன்றில் பணியாற்றுகிறார். ஊதியக் குறைப்பை ஏற்றுக்கொண்டாலும், இந்த மாற்றம் அவருக்கு அர்த்தமுள்ள பணியையும் சமூகத்தில் தாக்கத்தையும் அளித்தது. தொழில் வழிகாட்டுதல், கவனமான நிதித் திட்டமிடல், ஒருவரின் மாற்றித் தகுந்த திறன்களுக்கான அங்கீகாரம் ஆகியவை வெற்றிகரமான மாற்றத்தையும் தேக்கமடையும் மாற்றத்தையும் பல நேரங்களில் வேறுபடுத்துகின்றன.

மாற்றப் பாதை எப்படி அமையலாம்

மாற்றப் பாதை ஏற்கெனவே உள்ள திட்டங்களுக்குப் பதிலாக அமையாது. திட்டத்துடன் வேலையை விட்டு விலகுவோருக்கான இடைவெளிகளை நிரப்பி, அத்திட்டங்களை ஒன்றோடொன்று இணைக்கும். நோக்கத்துடன் எடுக்கும் இடைவேளைகளைப் பாதுகாப்பானதாகவும் குறுகியதாகவும் மாற்றி, தரமான வேலைகளுக்கான மீள் நுழைவை விரைவுபடுத்துவதே இதன் நோக்கம். ஆதரவை வரம்பற்ற மானியமாக மாற்றாமல், பல வடிவமைப்பு அம்சங்கள் இதைச் சாத்தியமாக்கும்.

• நோக்கமும் திட்டமும் அடிப்படையிலான தகுதி: அங்கீகரிக்கப்பட்ட நீண்டகாலப் படிப்பில் சேருதல், அங்கீகரிக்கப்பட்ட தகுதிக்குச் சேர்த்துக்கொள்ளக்கூடிய குறுந்தகுதிப் படிப்புகளைத் தொகுத்தல், அல்லது பகுதிநேரப் பயிற்சியுடன் இணைந்த காலவரம்புள்ள பராமரிப்புப் பொறுப்பு போன்ற தெளிவான இலக்குகளைக் கொண்ட கற்றல் அல்லது பராமரிப்புத் திட்டத்தை விண்ணப்பதாரர்கள் சமர்ப்பிக்க வேண்டும்.
• காலவரம்புள்ள வருமான ஆதரவு: முழுநேரப் பயிற்சி உதவித்தொகையைவிடக் குறைவான மாதாந்திர உதவித்தொகை, கடுமையான வாழ்நாள் உச்சவரம்புடன், அங்கீகரிக்கப்பட்ட பயிற்சிக்காக மூன்று முதல் 12 மாதங்கள் வரை ராஜினாமா செய்பவர்களுக்கு வழங்கப்படலாம். கடுமையான நிபந்தனைகளைப் பூர்த்தி செய்யும் 40 வயதுக்குட்பட்டவர்களையும், குறைந்த உச்சவரம்புடனும் அதிக இணைப் பங்களிப்புடனும் இதில் சேர்க்கலாம்.
• திரும்பச் செலுத்தக்கூடிய ஆதரவு: இலக்குகள் எட்டப்படாவிட்டாலோ பங்கேற்பாளர் பயிற்சியை முன்கூட்டியே கைவிட்டாலோ, உதவித்தொகையின் ஒரு பகுதியைத் திரும்பச் செலுத்த வேண்டியதாக மாற்றலாம் அல்லது எதிர்காலத்தில் வழங்கப்படும் அதிகப்படியான கடன்களில் பிடித்தம் செய்யலாம். இலக்குகளை நிறைவேற்றி வேலைக்குத் திரும்புவோருக்கு அபராதம் விதிக்கப்படாது; இதனால் முடிவுகளுக்கு ஏற்ப ஊக்கங்கள் அமையும்.
• மீள்பணியமர்த்தல் மற்றும் பணியிடப் பயிற்சி: பராமரிப்புப் பணிக்காக இடைவேளை எடுத்தவர்கள் மீண்டும் சந்தையில் நுழைய, கட்டமைக்கப்பட்ட பணியிடப் பயிற்சிகள் பாலமாக அமையும். உண்மையான திட்டங்களில் பயிற்சியாளர்களைச் சேர்த்து, அவர்களை நிரந்தரப் பணிக்கு மாற்றுவதற்கான தெளிவான வழியை வழங்கும் Attach and Train மாதிரியை இவை பின்பற்றலாம்.
• பராமரிப்புக் கடன்கள்: பயிற்சிக் காலத்தில் சார்ந்திருப்போரின் பராமரிப்புச் செலவைக் குறைக்க வரையறுக்கப்பட்ட நோக்கத்துக்கான கடன்கள் வழங்கலாம். உச்சவரம்புகள், ரசீதுகள், தணிக்கைகள் மூலம் அவை கட்டுப்பாட்டுடனும் இலக்குடனும் இருக்கும்.
• மாற்றத்தின்போது தொடரும் காப்பீடும் நல ஆதரவும்: அடிப்படை விபத்துக் காப்பீடு, மனநல ஆலோசனை, தொழில் வழிகாட்டுதல் ஆகியவற்றுக்கான அணுகல் தனிநபர்களுக்கும் முதலாளிகளுக்கும் ஏற்படும் அபாயத்தைக் குறைக்கும்.
• அடுக்கடுக்காகப் பெறும் கற்றலுக்கான அங்கீகாரம்: பட்டயங்கள் அல்லது பட்டப்படிப்புகளாகச் சேர்த்துக்கொள்ளக்கூடிய குறுந்தகுதிகள் திட்டத்தின் ஒரு பகுதியாகக் கணக்கில் கொள்ளப்பட வேண்டும். இதனால் அங்கீகரிக்கப்பட்ட தகுதிகளுக்கு இட்டுச்செல்லும் குறுகிய பயிற்சித் தொகுதிகள் ஊக்குவிக்கப்படும்.
• முதலாளிகளின் இணை முதலீடு: மீள்பணியமர்த்தப்படுவோரைப் பணியில் அமர்த்தவோ பணியிடப் பயிற்சி அளிக்கவோ ஒப்புக்கொள்ளும் நிறுவனங்கள், பணியிட மதிப்பீடுகள் மூலம் திறன்களை உறுதிப்படுத்தும்போது அதிக ஆதரவு பெறலாம். இதனால் பொதுநிதி உண்மையான தேவையுடன் இணைக்கப்படும்.
• வெளிப்படையான முடிவுகள்: ஏற்கெனவே உள்ள SkillsFuture அறிக்கைகளைப் போல, மாற்றப் பாதையில் பங்கேற்போரின் வேலைவாய்ப்பு விகிதங்கள், ஊதிய மாற்றங்கள், மீண்டும் வேலைக்குத் திரும்ப எடுத்துக்கொண்ட காலம் ஆகியவற்றை வெளியிட வேண்டும்; இதன்மூலம் எது பலன் தருகிறது என்பதைச் சந்தை அறியலாம்.

இந்தப் பாதை குறுக்குவழியாக அல்ல, பாலமாகச் செயல்படும். பராமரிப்பு, மீட்சி அல்லது குறிப்பிட்ட படிப்புக்காகத் திட்டமிட்டு வேலையை விட்டு விலகுவது தனிப்பட்ட இலக்குகளுக்கும் பொதுநல இலக்குகளுக்கும் உதவும் என்பதை இது உணர்த்தும். தெளிவான இலக்குகளும் உறுதியான உச்சவரம்புகளும் இருந்தால், இது நிதி ஒழுங்குடன் சமூகப் பயனையும் அளிக்கும்.

பிற நாடுகளும் ஆய்வுகளும் கற்றுத்தருவது என்ன

பொருளாதாரங்கள் டிஜிட்டல் மற்றும் பசுமைத் திசைகளில் மாறுவதால் தொழில் பாதைகள் மிகுந்த நெகிழ்வுடையவையாகி வருவதாக OECD ஆய்வுகள் தெரிவிக்கின்றன. வயது கூடும்போது வேலை மாறும் விகிதம் குறைகிறது. இருந்தாலும், நடுத்தர மற்றும் பிந்தைய வாழ்க்கைக் கட்டங்களில் விருப்பத்துடன் மேற்கொள்ளும் மாற்றங்கள் பெரும்பாலும் ஊதியத்தையும் பணித் தரத்தையும் மேம்படுத்துகின்றன; விருப்பமின்றி ஏற்படும் மாற்றங்கள் வருமானத்தைப் பாதிக்கின்றன. வேலை இழப்புக்குப் பிறகு மட்டுமே செயல்படும் கொள்கைகள், ஆரோக்கியமான திட்டமிட்ட மாற்றங்களுக்காக மக்களைத் தயார்படுத்தும் வாய்ப்பைத் தவறவிடுகின்றன. வயது பாகுபாடு, டிஜிட்டல் திறன்களில் உள்ள இடைவெளி, குறைந்த புவியியல் நெகிழ்வுத்தன்மை, கட்டுப்படுத்தும் உரிமங்கள் அல்லது போட்டியாளரிடம் வேலை செய்வதைத் தடுக்கும் ஒப்பந்தங்கள் போன்ற விதிமுறைகள் தொழில் நகர்வைத் தடுக்கின்றன.

நடைமுறை கருவிகள் பயனளிக்கின்றன. நடுப்பணி வாழ்க்கை மதிப்பாய்வுகள், அதிர்ச்சி ஏற்படுவதற்கு முன்பே தொழிலாளர்கள் தங்கள் திறன்களை மதிப்பிட்டு வாய்ப்புகளை ஆராய உதவுகின்றன. வேலை நேர நெகிழ்வுத்தன்மையும் தொலைநிலை அல்லது கலப்பு வேலைவாய்ப்புகளும், பிற பொறுப்புகளையும் சமநிலைப்படுத்திக்கொண்டு வயதான தொழிலாளர்கள் பணியில் தொடர உதவுகின்றன. நிறுவனத்துக்குள் பணி மாற்றம் ஊதிய வளர்ச்சிக்கு முக்கியமானது; ஆனால் அதற்கான பாதைகள் பெரும்பாலும் தெளிவற்றவை. கட்டமைக்கப்பட்ட மதிப்பாய்வுகள், திறன் கடவுச்சீட்டுகள், பணியிடச் சோதனை வாய்ப்புகள் ஆகியவை புதிய வழிகளைத் திறக்கலாம். வழிகாட்டுதல், காலவரம்புள்ள ஆதரவு, உண்மையான பணிகளுக்கான வழிகள் ஆகியவற்றை இணைக்கும் மாற்றப் பாதையுடன் இந்தக் கருத்துகள் ஒத்துப்போகின்றன.

பயிற்சியிலிருந்து திறன் உறுதிப்படுத்தல் வரை முதலாளிகளின் பங்கு

பொது நிதி தொழிலாளர்களை வாயில்வரை அழைத்துச் செல்லலாம்; ஆனால் எது தகுதியாகக் கருதப்படும் என்பதை முதலாளிகளே தீர்மானிக்கின்றனர். அதனால்தான் திறன் உறுதிப்படுத்தும் கட்டமைப்புகளும் உண்மையான வேலைப் பாதைகளும் இன்றியமையாதவை. UOB-இன் Better U திட்டம், சிறிய பயிற்சித் தொகுதிகள் நம்பிக்கையை வளர்ப்பதையும், பின்னர் குறிவைத்த Pivot திட்டம் திறன் வளர்ச்சியைப் புதிய பணிகளாக மாற்றுவதையும் காட்டுகிறது. அதிகத் தேவை உள்ள பணிகளை அடையாளம் காணுதல், திறன் இடைவெளிகளை வரையறுத்தல், வேலை வாய்ப்புடன் முடியும் ஊதியத்துடன் கூடிய மறுதிறன் பயிற்சிப் பாதைகளை வழங்குதல் ஆகியவற்றின் மூலம் பிற நிறுவனங்களும் இந்த அணுகுமுறையைப் பின்பற்றலாம்.

பொதுத்துறையில், வேலை விளம்பரங்களை ஆய்வாளர்கள் ஏற்கெனவே ஆய்வு செய்து திறன் தேவைகளைக் கண்காணிக்கின்றனர். முதலாளிகளிடமிருந்து தெளிவான தேவை உள்ள பாடநெறிகளுக்கு நிதியை வழிநடத்த இந்தத் தகவல் உதவும். பயிற்சியில் முதலாளிகளின் பங்களிப்பு அதிகரிக்க வேண்டும் என்று அரசாங்கம் வலியுறுத்தியுள்ளது. முதலாளிகள் நம்பும் தொழில்துறை அளவிலான திறன் உறுதிப்படுத்தும் கட்டமைப்பு பங்கேற்பை அதிகரிக்கலாம். அங்கீகரிக்கப்பட்ட குறுந்தகுதிகளைப் பணியமர்த்தலிலும் பதவி உயர்விலும் நிறுவனங்கள் மதிப்பிட்டால், பயிற்சியால் கிடைக்கும் பலன் இன்னும் தெளிவாகத் தெரியும்.

சலுகையாக மாறாமல் இதைச் செயல்படுத்துவது எப்படி

மாற்றப் பாதைக்கு கடுமையான பாதுகாப்பு வரம்புகள் இருக்க வேண்டும். தகுதியை அங்கீகரிக்கப்பட்ட திட்டத்துடன் இணைத்து குறுகியதாக வைத்திருக்க வேண்டும். முழுநேர, பகுதிநேரப் பயிற்சி உதவித்தொகைகள் இரண்டுக்கும் பொதுவான வாழ்நாள் உச்சவரம்பை நிர்ணயிக்க வேண்டும். சில மாதங்களுக்கு ஒருமுறை முன்னேற்ற இலக்குகளைப் பூர்த்தி செய்யக் கோர வேண்டும். மாற்றங்கள் குறுகிய காலத்திலும் நோக்கத்துடனும் நடைபெற, வருமான ஆதரவுடன் வழிகாட்டுதலையும் வேலைப் பொருத்தத்தையும் இணைக்க வேண்டும். குறைந்த வருமானம் கொண்ட தொழிலாளர்களுக்கும் பராமரிப்புப் பொறுப்பாளர்களுக்கும் அதிக ஆதரவும், மற்றவர்களுக்கு குறைந்த ஆதரவும் வழங்கி, சாத்தியமுள்ள இடங்களில் இணைப் பங்களிப்பையும் கோரலாம்.

பொது நிதியை முடிவுகளுடன் இணைக்க வேண்டும். வேலைவாய்ப்பு மற்றும் வருமானத்தில் சிறந்த முடிவுகளைப் பெறும் பயிற்சி வழங்குநர்களுக்கு அதிக இடங்கள் வழங்கப்பட வேண்டும். பயிற்சியாளர்களை நிரந்தரப் பணியில் அமர்த்தும் பணியிடப் பயிற்சிகளை வழங்கும் முதலாளிகளுக்கு ஆதரவு கிடைக்க வேண்டும். இலக்குகளை நிறைவேற்றி மீண்டும் வேலைக்குத் திரும்புவோர் முழு ஆதரவையும் தக்கவைத்துக்கொள்ளலாம். உறுதிமொழிகளை நிறைவேற்றாதவர்களிடமிருந்து ஆதரவு திரும்பப் பெறப்பட்டு, பிறருக்கு வழங்கப்பட வேண்டும்.

அபாயங்களும் அவற்றைக் கையாளும் வழிகளும்

உண்மையான கவலைகள் உள்ளன. ஆதரவு கிடைக்கும் என்ற எதிர்பார்ப்பில் சிலர் ராஜினாமா செய்தால், தவறான ஊக்கம் ஏற்படலாம் என்று சிலர் அஞ்சுகின்றனர். தகுதிச் சான்றிதழ்கள் அளவுக்கு மீறி பெருகுவது அல்லது பயிற்சிக்கும் வேலைகளுக்கும் இடையே பொருத்தமின்மை ஏற்படுவது குறித்தும் மற்றவர்கள் கவலைப்படுகின்றனர். வரவுசெலவுத் திட்ட ஒழுங்கு முக்கியம். சில வயதுக் குழுக்கள் அல்லது துறைகளுக்கு நியாயமற்ற முன்னுரிமை அளிக்கும் வகையில் திட்டங்கள் அமையக்கூடாது. கடுமையான உச்சவரம்புகள், குறிவைத்த தகுதி நிபந்தனைகள், வெளிப்படையான அறிக்கையிடல் ஆகியவற்றால் இந்த அபாயங்களைக் கட்டுப்படுத்தலாம்.

வடிவமைப்புத் தேர்வுகள் உதவும். உதவித்தொகையை மிதமானதாகவும் காலவரம்புடையதாகவும் வைத்திருக்க வேண்டும். குறிப்பாக இளங்கலைப் பட்டம் வரையிலான அங்கீகரிக்கப்பட்ட தகுதிகளாகச் சேர்த்துக்கொள்ளக்கூடியதும் முதலாளிகளிடமிருந்து தெளிவான தேவையுள்ளதுமான படிப்புகளுடன் ஆதரவை இணைக்க வேண்டும். தொழிலாளர்கள் முழுமையாகப் பணியிலிருந்து விலகாமல் பயிற்சி பெற, பகுதிநேர வாய்ப்புகளை விரிவுபடுத்த வேண்டும். திறன் சான்றுகள் நம்பகமானவையாக இருக்க, உறுதிப்படுத்தும் கட்டமைப்புகளின் ஆதரவுடன் நிறுவனத்துக்குள் பணிமாற்றங்களை ஊக்குவிக்க வேண்டும். ஒரு காலகட்டத்துக்கு வேலையிலிருந்து விலகுவதற்குப் பராமரிப்புப் பணியையும் மனச்சோர்விலிருந்து மீள்வதையும் நியாயமான காரணங்களாகக் கருதி, பின்னர் பணிக்குத் திரும்புவதற்கான உறுதியான பாதையை உருவாக்க வேண்டும்.

முக்கிய அம்சங்கள்

• வேலை தேடுவோருக்கும் தங்கள் நிறுவனங்களின் ஆதரவுடன் மறுதிறன் பெறுவோருக்கும் சிங்கப்பூரின் மறுதிறன் அமைப்பு வலுவாக உள்ளது; ஆனால் திட்டத்துடன் தாங்களாகவே வேலையை விட்டு விலகுவோருக்கு ஆதரவு குறைவாக உள்ளது.
• சுமார் 30 துறைகளில் Place and Train, Attach and Train, Job Redesign Reskilling ஆகிய வகைகள் மூலம் Career Conversion Programmes மறுதிறன் பயிற்சிக்கு உதவுகின்றன.
• முன்பு வேலையில்லாத SkillsFuture Career Transition பயிற்சியாளர்களில் சுமார் 55 சதவீதத்தினர் ஆறு மாதங்களுக்குள் வேலை பெற்றனர்; புதிய கடன்களும் உதவித்தொகைகளும் அறிமுகமான பிறகு சேர்க்கை ஆறு மடங்கு உயர்ந்தது.
• Level Up Programme 40 வயது மற்றும் அதற்கு மேற்பட்ட குடிமக்களுக்கு S$4,000 கூடுதல் கடன், அதிக மானியங்கள், மாதம் S$3,000 வரையிலான முழுநேரப் பயிற்சி உதவித்தொகை ஆகியவற்றை பொதுவான வாழ்நாள் உச்சவரம்புடன் வழங்குகிறது; அடுத்த ஆண்டு முதல் பகுதிநேர உதவித்தொகையாக மாதம் S$300 வழங்கப்படும்.
• திட்டமிட்டு வேலையை விட்டு விலகுவோருக்கான ஆதரவு சீரற்றதாக உள்ளது; குறிப்பாக 40 வயதுக்குட்பட்டவர்களுக்கும் பராமரிப்புப் பணி அல்லது மனச்சோர்விலிருந்து மீள்வதற்காக இடைவேளை எடுப்போருக்கும்.
• தெளிவான இலக்குகளுடன் கூடிய காலவரம்புள்ள, திரும்பப் பெறக்கூடிய ஆதரவு, மீள்பணியமர்த்தல் வாய்ப்புகள், அங்கீகரிக்கப்பட்ட தகுதிகளுக்குச் சேரும் கற்றல் ஆகியவற்றைத் தனிப்பட்ட மாற்றப் பாதை வழங்கலாம்.
• விருப்பத்துடன் வேலை மாறுவோருக்கு முன்கூட்டிய ஆதரவு வழங்குவது நடுத்தர வயது மற்றும் வயதான தொழிலாளர்களின் பணித் தரத்தை மேம்படுத்தும் என்றும், வேலை இழந்த பிறகு வழங்கப்படும் எதிர்வினை ஆதரவு ஊதியப் பாதிப்புகளைத் தடுக்கப் பல நேரங்களில் போதாது என்றும் OECD ஆய்வுகள் தெரிவிக்கின்றன.
• முதலாளிகள் முக்கியப் பங்கு வகிக்கின்றனர்; UOB-இன் Pivot போன்ற திறன் உறுதிப்படுத்தும் கட்டமைப்புகளும் ஊதியத்துடன் கூடிய மறுதிறன் பாதைகளும் பயிற்சியை உண்மையான பணிகளாக மாற்றுகின்றன.
• வலுவான பாதுகாப்பு வரம்புகள், முடிவுகளின் அடிப்படையிலான நிதி, வெளிப்படையான அறிக்கையிடல் ஆகியவை மாற்றப் பாதையை இலக்குடனும் நிதி ஒழுங்குடனும் வைத்திருக்க உதவும்.
• பராமரிப்புப் பணியையும் மனச்சோர்விலிருந்து மீள்வதையும், நல்ல வேலைகளுக்குத் திரும்புவதற்கான கட்டமைக்கப்பட்ட வழிகளுடன் இணைக்கப்படும்போது சமூகத்துக்குப் பயனளிக்கும் நியாயமான பணி மாற்றங்களாகக் கருத வேண்டும்.